Dalawang buwan na ang nakararaan nang mabatid namin ang tungkol sa "Care Home." Lumabas ang artikulo ni Jun Lalin sa Abante tungkol sa pagiging busy ni Nora sa paggawa ng "Care Home" na idinirihe ni Suzette Ranillo.Nagpasalamat kami kay Jun sa pagbibigay-espasyo para kay Nora Aunor. Nagpasalamat naman ito sa amin sa pagbabasa ng kanyang artikulo at ibinalita na siya ay kasalukuyang nasa Amerika ng panahong 'yon. Pinilit naming makipag-meeting sa kanya. Masaya ang aming pagtatagpo kahit sandali lang.

Isang buwan pagkatapos, nakapagsabi sa amin si Suzette na maganda ang bentahan ng mga tickets. Sa kabila ng mga negative publicities tungkol kay Nora lalo na ang kanyang paghain ng "guilty plea," nakatulong ang mga ito para mag-create ng curiosity at awareness kay Nora ang mga Pinoy.

Hanggang dumating ang April 23rd. Dalawang oras bago magsimula ang screening, puno na ang parking lot ng Palace of Fine Arts na isa sa malalaking venue na pinagdarausan ng engrandeng events gaya ng 1976 US Presidential Debate, Late Night Show with David Letterman, Wheel of Fortune, comedy shows nina Whoopie Goldberg, Rosie O'Donnell at Robin Williams, San Francisco Ballet, James Bond World Premiere, San Francisco International Filmfest, concerts nina Celine Dion at Tracy Chapman, atbp. Magandang senyales 'yon lalo na para sa mga Noranians. Sa lugar ding 'yon ginanap ang premiere ng "Milan" na pinutakti rin ng mga Pinoy. Sa lobby ay makikita na ang maraming tao. Nakakagulat din na ilan sa mga ito ay ibang lahi - Puti, Latino, Itim, Asyano, atbp. Subtitled pala ang pelikula!

Maya-maya lang ay dumating na ang ibang members ng cast na sina Divina Valencia, Rebecca Quintana, Gloria Sevilla, Juni Ranillo, Jo Awayan, Lailani Navarro, atbp. Divang-diva pa rin ang dating ni Ms. Divina Valencia na lumipad pa mula San Diego. Biro ni Divina, "Hoy mga Noranians, siguradong magugustuhan ninyo ang pelikula. At mga day, baklang-bakla ako dito!" Maaalala si Divina bilang kasabayan ni Stella Suarez noon sa pagpapa-sexy. Siya rin nga ba ang pumukpok ng mikropono sa ulo ni Dr. Rey dela Cruz sa show ni Inday Badiday noon?

Lipat naman ang mga camera kay Gloria Sevilla na nagsabing, "salamat sa inyo, mga Noranians, ha." Wika ni Tom, "hindi po, kami po ang dapat magpasalamat sa inyo sa pagbibigay ninyo ng proyekto para kay Ate Guy." "Aba, syempre naman, alam naman ninyo, Noranian kaming buong pamilya." Sigawan ang mga Noranians.

Sa lobby rin ay makikita ang mga ibinebentang official DVDs ng "Darling, Buntis Ka Na Naman" na pinagsamahan nina Nora at Mat Ranillo III noong 1980 at idinirihe ni Amado Cortez. Madaling naubos ito. Pati ang mga souvernir programs ay mabilis ding naibenta. Prominente ang GMA-7 sa lobby. Napag-alaman naming GMA-7 pala ang tutulong sa pagpapalabas ng "Care Home" sa Pilipinas.

Sa wakas ay dumating na si Nora Aunor! Hiyawan nang malakas ang mga tao. Nagmistulang palengke ang venue. Kesehodang naka-formal attire ang karamihan doon. Leather jacket at maong ang suot ni Nora. Maganda ang aura niya. Slim siya. Bulong ng isa, "salamat naman at nag-ayos si Guy...alam nyo naman ang lola natin, wa siya care sa mga make-up, make-up na ganyan." Namataan din namin ang ilang mga Vilmanians sa lobby. Silent members kami ng e-group nila kaya kilala namin sila sa mukha. "Maganda siya, ha!," sabi ng isa.

Hindi naghintay nang matagal ang mga manonood dahil agad na umakyat ang emcee para tawagin ang cast at crew ng pelikula. Maraming pinasalamatan si Suzette - mga taong tumulong maisakatuparan ang pelikula. Hanggang tinawag si Nora para umakyat sa entablado.

"Maraming maraming salamat po sa pagdalo ninyo," simpleng wika ng Superstar. Masigabong palakpakan ang ganti ng audience.

Si Divina Valencia ang pinalakpakan nang napakalakas. Bakit? Dahil sa sinabi niyang, "maraming salamat at muli ninyong ipinakita ang suporta ninyo kay Nora Aunor." Noranian nga ba itong si Banak na tago ang kalahating mukha sa pelikulang "Dyesebel?" Mahal ng mga Noranians ang mga nagmamahal kay Nora.

Hindi nagtagal ay sinimulan na ang palabas. Tahimik ang lahat at nakapako ang paningin nila sa telon. Punung-puno ang Palace of Fine Arts na may malaking kapasidad na 962. Nung gabi bago ang premiere, nakumpirma na naming sold-out ang "Care Home."

Istorya ni Claudia (Nora Aunor) at ng mga tao sa paligid niya ang "Care Home." Isang caregiver si Claudia sa Amerika ngunit may Ph.D. ito sa History sa Pamantasan ng Lungsod ng Maynila. Simpleng buhay lang ang kanya. Bahay-trabaho ang ruta niya araw-araw. Wala siyang luho sa katawan pero magulo ang buhay niya sa kanyang sariling tahanan. Isang batugan na Puti ang kanyang asawa (Joe Buono) na wala nang ginawa kundi humilata sa sofa, uminom ng serbesa at manood ng TV. Laging ganon ang dinaratnan niyang eksena pagkagaling sa trabaho kaya para na lang silang mag-roommate ng kanyang asawa. Minsan ay dinatnan ni Claudia ang kanyang ina na si Cora (Gloria Sevilla) na nakikipagbangayan sa kanyang asawa. Mas lalong nagpuyos ang galit ni Claudia nang isang araw ay madatnan nitong nag-aaway ang kanyang ina at asawa dahil sinaktan umano ng huli ang kanilang anak.

Nagdesisyon si Claudia na ilagak ang kanyang ina sa isa niya pang "tahanan" - ang mismong carehome na pinagtatrabahuhan niya. Para sa kanya, tama ang kanyang naging desisyon dahil mahal siya ng mga tao sa carehome at para na rin mabantayan ang kanyang ina nang maayos. Hindi iyon matanggap ni Cora pero unti-unti ay nakapag-adjust ito. Dito niya naging kaibigan ang matabil na residente na si Delilah (Divina Valencia), isang dating bar girl sa Olongapo na nakapangasawa ng isang Amerikano. Bakla ang pananalita ni Delilah kaya kwelang kwela ito sa audience. Bawat nakakatawang eksena ni Divina ay pinapalakpakan. Sa carehome din nakilala ni Cora ang isang ulyaning residente (Rebecca Quintana) na madalas dalawin ng kanyang apong si Gilbert (Germaine de Leon Padilla) at itinakas pa nito minsan. Caregiver din si Obet (Juni Ranillo) na isa palang doktor sa Pilipinas at tuluyan nang nag-TNT pagkatapos um-attend ng isang medical convention sa Amerika.

Hindi magawang mapatawad si Claudia ng kanyang ina. Makailang ulit itong tinanggihan ng ina sa paglapit nito sa kanya. Mismong mga pagkain at gamot na iniaabot sa kanya nito ay tinatabig niya. Poot at sama ng loob ang nasa puso nito. May ilang eksenang nakaaantig ng damdamin gaya ng tabihan ni Claudia ang natutulog na ina, yakapin ito, halikan, at haplusin. Nananabik si Claudia sa ina. Ilang manonood ang nasilayan naming nabagbag ang loob at nagpunas ng luha. Unang-una na si Beau.

Hanggang isang araw ay bigla na lang sumakit nang matindi ang tiyan ni Claudia. Sa mga sumunod na eksena ay mapapag-alaman na ito pala ay may "gastric cancer." Di sinasadyang makita ni Obet ang pain medicine na iniinom ni Claudia. Itinago ni Claudia ang sakit niya sa kanyang ina. Isang araw ay na-ospital ito at doon na tuluyang naisiwalat kay Cora ang tunay na kalagayan ng kanyang anak. Di naglaon ay si Claudia na ang nakaupo sa wheelchair na itinutulak ng mga kasamahan niya sa trabaho. Si Claudia, na dating nagbibigay ng tulong bilang isang caregiver ay isa na ngayong pasyente na nangangailangan ng tulong. Nagkaroon ng Christmas party sa carehome. Marami ang napaluha sa monologue ni Claudia sa kanyang mga kaibigan: "this is a very special Christmas for me and I'm happy spending it with all of you...as you may know, I will be gone for a long time...I'm taking a much needed vacation, a very long vacation...I will surely miss you...thank you so much for treating me like your own daughter...maybe someday, we will see each other again..." Sa susunod na eksena'y wala na si Claudia. Nagpatawaran ang ina at asawa nito.

Sigurado kaming sabik ang lahat ng mga Noranians kay Nora Aunor, maging ang mga ito ay diehard, not-so-diehard, a-little-bit-diehard, dieharder, diehard-before-but-not-anymore, o mga Noranian na patuloy ang pagpuna sa kanya.

Mahusay si Nora sa kabuuan kahit sa isang simpleng eksena: Dumating siya ng bahay mula sa trabaho nang pagod, excited ang kanyang asawa na naghanda ng dinner at wine para sa kanilang dalawa, gulat na gulat si Claudia sa "bagong ihip ng hangin" ngunit mas ginusto pa nitong magpahinga kaysa saluhan ang asawa. Very touching din ang eksenang nagpatawaran ang mag-ina habang nasa ospital si Claudia. Mahusay ang pagkakaganap nina Gloria Sevilla at Divina Valencia. Maging ang suporta ng mga Amerikanong sina Germaine Padilla at Joe Buono, na pawang lehitimong aktor ay kapanipaniwala. Hindi kami magtataka kung makakuha ng isa o dalawang nominasyon si Divina Valencia sa award derbies sa susunod na taon.

Pagkatapos ng palabas ay nagpaunlak ang cast members sa pangunguna ni Nora na mag-sign ng autograph.

Isang malaking tagumpay ang "Care Home." Dinumog ito ng mga Pinoy. Balita nami'y maglilibot pa ito sa ibang lugar sa Amerika at sa ibang bansa. Sa Pilipinas naman ay Oktubre ang palabas nito. Sana nga'y maging matagumpay din ito sa Pilipinas.

Ang tagumpay ng "Care Home" ay tagumpay ni Nora Aunor at ng kanyang mga tagahanga. Isang katunayan ito na marami pa ring nagmamahal sa kanya.

Sana ay magtulong-tulong lahat ng mga Noranians sa pagsulong ng sining ni Nora Aunor. Aminin man ng iba o hindi, tanging si Nora Aunor ang tinaguriang "phenomenal" sa Philippine showbiz. Manatili sana ang N-O-R-A sa mga N-O-R-A-nians, sa isip, sa salita at higit sa lahat, sa gawa.